Меѓународниот фестивал „Охрид-фест – Охридски трубадури“ распишува конкурс за нови композиции за своето 27. издание што ќе се одвива од 10 до 12 септември 2020 година во три вечери: Фолк, Поп и Интернационална вечер,.
Фолк вечерта ќе се одржи на 10 септември и за прв пат ќе биде со интернационален карактер, односно, освен новосоздадени фолк песни од нашата земја, со свои нови песни ќе можат да учествуваат и странски автори - од регионот и пошироко.
Поп-вечерта е закажана за 11 септември, а финалната Интернационалната вечер за 12 септември 2020 година.
Условите за учество на „Охрид фест – Охридски трубадури 2020“ се следниве:
* Да се испрати демо-снимка и текст на македонски јазик;
* Наслов на композицијата;
* Назнака – за која фестивалска вечер е наменета песната (Поп, Фолк, Интернационална);
* Композициите претходно да не бидат изведувани;
* Податоци на авторите (име, презиме, авторската улога во тимот), и контакт информации;
„Охрид фест – Охридски трубадури“ ќе одбере и двајца дебитанти кои ќе добијат можност да настапат на фестивалската сцена. Демо-снимките од нивните композиции е потребно да бидат со пратечки инструменти, пијано и гитара.
Своите композиции авторите треба да ги испратат на следниве електронски адреси: ohridfest.produkcija@gmail.com и grigorkoprov@yahoo.com
На конкурсот можат да учествуваат сите домашни и странски автори кои ги исполнуваат условите за учество, а рокот за поднесување на пријавите е до 30 мај 2020 година.
„Охрид Фест – Охридски трубадури„, спаѓа во редот на најстарите во земјава и е единствен што ги надминува нашите, регионалните и европските граници. Видливоста од, во просек, 200 милиони гледачи и 200 часа директен пренос и бројни одложени емитувања овозможуваат долготрајно и сеопфатно меѓународно претставување на авторите и на нивните песни пред милионскиот аудиториум.
Повеќе информации за „Охрид фест – Охридски трубадури 2020“ на сајтот на Фестивалот, како и на официјалните страни на Facebook и Instagram.